今日小編同大家介紹另外一對石地鞋。咁啱先前外國感恩節，啲足球鞋平咗好多，鍾意ball boot嘅我就當然要入手啦～睇完又睇，揾到呢對心水: Nike Tiempo legacy IC, 為石地場嘅Tiempo最貴版。
小編有幸以接近半價購入！Tiempo就如先前所講，深受後衛歡迎。呢對係nike嘅傳統球鞋，皮製，主要係玩球感。
Tiempo legacy IC 係由軟熟嘅牛仔皮製造，摸落去非常柔軟。佢同市面嘅Tiempo genio leather好唔同，一嚟隻皮唔同，軟熟好多，二嚟塊皮唔係黑色而係灰灰地嘅黑。此外，科技上佢用咗hypershield嘅技術，令牛仔皮變得唔容易吸水，雨天嘅時候都可以盡量保持乾爽，唔影響球鞋嘅發揮。球鞋另外特別嘅地方就係佢鞋頭有塊磨砂嘅物料晌到，相信佢嘅工用係有助皮球踢出時嘅轉動。
小編最近就拎咗對鞋去石地場踢友賽，一開始都的確要十分鐘到去適應，所以一開始自然會多啲失誤。踢多一陣，感覺到腳與鞋開始融入，傳與控個感覺開始翻番黎。不過因為鞋底係偏厚，斬波上的確要花啲心機去微調。微調到咁上下，牛仔皮球感嘅威力就慢慢出嚟，中場隊友向後回傳，踢中堅嘅小編再作first touch長傳予翼位，又的確係幾準吓！
至於避震層面上，小編就覺得Tiempo legacy IC 做得幾好, 一路跑就覺得好似有塊軟墊墊住咁，仲要係感受到鞋底同地下係有種神奇嘅觸感，就好似赤住腳咁跑咁，好順暢。
Tiempo Legacy IC 的確係幾好，而且鞋身偏大，絕對係闊腳人嘅恩物。不過佢嘅定價的確係有啲貴，為約$800港紙。此外，小小提示嘅係呢對鞋係有啲細，例如小編著開嘅係US8, 咁就要著US8.5。
小編認為呢對鞋適合多攔截，又同時喜歡控球發動組織嘅你，畢景佢嘅保護性係Nike內最強，同時牛仔皮所產生嘅球感係無可替代嘅！
Search